البحث

تـــــــــــــــــــــــــاء مربوطة

10-06-2014 12:43


كتير اوي بقرأ على الفيس او بسمع تعليقات من الناس ان الستات دول مرضى نفسيا و دول مجانين و دول و دول......



لكن انا عايزة اسال....



لما راجل كدة بطوله و عرضه يمشي يعاكس واحدة بكل الانواع يبقى مش ده مريض نفسي !!!

و لما راجل واقف جنبه يشوف اللى حصل ده و يسكت مش ده يبقى مريض اكتر منه !!!

و التاني يقولها اتكلي على الله يابنتي روحي متفضحيش نفسك مش ده مريض نفسي !!!

و لما الـ XY ده يدخل يكتب البنت هي السبب هي اللي لابسة وحش مش ده يبقى اشد مرض منهم !!!



طيب بلاش... في فترة الانتخابات اللى فاتت

الفيس كله بلا استثناء لقيت كل الولاد كل تعليقاتهم ان ستات مصر رقاصين

و يلا عشان هترقصي

و انت بترقصي انزلي بالسيناوي

و...و....و....



انت لما تهين ستات بلدك اللي اولهم امك اقرب الناس ليك شايف نفسك كدة راجل !!! و لا مريض نفسي !!!



اللي يسرق صور بنات على الفيس لاغراض مش كويسة ده مش مريض نفسي !!!



و برضو اللي يبرر ان الصور هي اللي مش محترمة مش ده مريض نفسي !!!



اللي يضيف بنت ميعرفهاش و يقولها ممكن نتعرف مش ده مريض نفسي !!!



اللي يقعد مع اصحابه يفرجوا بعض صور البنات اللي عندهم على الفيس و يقولهم الحق ياض شوفت الصورة اللى نزلتها فولانة امبارح مش ده مريض نفسي !!!



اللي يقعد يجرب نمر موبايل لحد ما بنت ترد عليه و يستلمها كل يوم الفجر يرن و يسمعها ازبل كلام مش ده مريض نفسي !!!



الراجل اللي يلاقي مراته او امه تعبانة في البيت طول اليوم و ده يقعد يتأمر عليها و ميرضاش يساعدها علشان دي الحاجة الوحيدة اللي بتحسسه برجولته مش ده مريض نفسي !!!



لما الام تبقى عيانة اوي و تلاقي جوزها و ابنها نازلين فيها اوامر و لا حاسين بيها لكن اول ما واحد منهم يعطس يفضل راقد على السرير كانه في العناية مش ده مرض نفسي !!!



الراجل اللي يعيش طول عمره متحسر انه مجابش ولد يشيل اسمه مش ده مرض نفسي !!!



اللي يعيش مقضيها مع بنات براحته علشان هو راجل محدش هيجيب سيرته مش ده مريض نفسي !!!



اللي اول ما يشوف بنات اجانب يجري عليهم عشان يتصور معاهم و هو حاضنهم مش ده نقص و مرض نفسي !!!



سيبكوا من ده كله

عارفين في مجال الطب...

يقولولك مينفعش تتخصصي في المجال ده اصله مش بتاع بنات مش ده مرض نفسي !!!



لما الدكتور يتعصب علشان عرف ان بنت اللي هتبقى معاه في العيادة الشهر ده و يقولها احنا محتاجين ولد و ميحاولش يعلمها كلمة مش ده مرض نفسي !!!



طب بلاش كدة...

الراجل اللي يقعد يقول و يعيد في سواقة البنات و اول ميشوف واحدة سايقة يقصد يربكها و ينهال عليها شتيمة مش ده مريض نفسي !!!



لما تلاقي البنت مش عارفة تحلم ولا تطور نفسها علشان محتاجة تسافر هنا و هناك علشان في بلدها بيسموه تنططة و مش امان عليها تركب و تنزل و تمشي لوحدها مش ده مرض نفسي !!!



و في الاخر تلاقي البنت لسة بتضحك تسمع اد ما تسمع طول ماهي برة البيت و تتجرح و اول ماتوصل بيتها تحمد ربنا انه سترها معاها و تلاقيها بتضحك

تستحمل سفالة الشارع و اول ما توصل المكان تدخل تسلم عليك و هي بتضحك

تتمرمط مع اسرتها و اول ما تخلص طلبات و يناموا تقعد تريح شوية و تضحك

تستغنى عن اي حلم في حياتها عشان بنت و تلاقيها تدور على غيره و لسة بتضحك

كل من هب و دب يتحكم فيها و هي ترضى و تسكت و تضحك



و في الاخر البنات مجانين !!! فعلا هما مجانين علشان استحملوا كل ده و ساكتين !!!



و على فكرة مش مستنين من حضرتك تدخل تكتبلنا كلمتين تشجيع  و انتي زي الفل و ميهمكيش و... و... و....



يا يتنزل الشارع و تعترض علشاننا لو متضايق اوي يا تسكت و بلاش تتاجر بينا  علشان يوقولوا عليك منصف و بتهتم بحقوق المراة



و ياريت تفكر مليون مرة قبل ما تقول على البنات مجانين



منقول للامانة





تعليقات القراء
اخبار مثبتة
اخبار مثبتة
اخبار مثبتة

اتصل بنا صفحتنا على الفيس بوك خدمة ار اس اس ليصلك كل جديد تابعنا على اليوتيوب